Primary tabs
Berkarar döwletimiziň bagtyýarlyk döwrüniň her bir güni uly ösüşlere, rowaçlyklara we toýdyr baýrama beslenýär. Baharyň gelmegi bilen,ýaşyl reňkli baýdagy buýsanç bilen parlaýan ýurdumyzda Halkara zenanlar güni mynasybetli geçirilýän baýramçylyk çäreleri şatlyk-şowhuna beslenýär. Her ýyl hormatly Prezidentimiz bu baýramçylyk mynasybetli kümüş saçly käbelerimizi, baýdak boýly gelinlerimizi, eýjejik uýalarymyzy, çagalar bagynyň körpe gyzjagazlaryny, okuwçy we talyp gyzlarymyzy özüniň Şa serpaýy bilen begendirýär.
Bütin dünýäde belli bolşy ýaly, Türkmenistanda hem baharyň ilkinji günlerinde Halkara zenanlar güni mynasybetli köp sanly çäreler geçirilýär. Şonuň ýaly çäreleriň her ýyl geçirilýän ýeri bolan Türkmenistanyň Döwlet medeniýet merkeziniň Döwlet muzeýinde «Arkadagly Watanda bagtyýar zenanlar» atly sergi gurnaldy. Bu sergide muzeýiň gaznasynda goralyp saklanylýan zenan bezeg şaýlary, haly we haly önümleriniň birnäçe görnüşleri, ussat suratkeşlerimiziň çeken eserleri hem-de häzirki döwürde döredilen nakgaş eserleriniň birnäçesi görkezilýär. Şonuň ýaly-da, bu ýerde milli zenan lybaslarynyň gadymy nusgalaryny-da görmek bolýar.
Bu çäre dabaraly ýagdaýda Türkmenistanyň Döwlet medeniýet merkeziniň Döwlet muzeýiniň direktory, taryh ylymlarynyň kandidaty Öwezmuhammet Mämmetnurow tarapyndan açyldy.
Şeýle-de sergide birnäçe adamlar çykyş etdiler: Türkmenistanyň Ylymlar akademiýasynyň Magtymguly adyndaky dil, edebiýat we milli golýazmalar institutynyň işgäri, dil we edebiýat ylymlarynyň doktory, Türkmenistanyň medeniýetde at gazanan işgäri Şirinjemal Geldiýewa, Türkmen Döwlet medeniýet we sungat mekdebiniň mugallymy Jumamyrat Artykow, Türkmenistanyň at gazanan medeniýet işgäri, şahyr Oguljemal Çaryýewa, Türkmenistanyň Ylymlar akademiýasynyň Magtymguly adyndaky dil, edebiýat we milli golýazmalar institutynyň esasy ylmy işgäri, dil we edebiýat ylymlarynyň kandidaty Täzegül Hapyzowa, Türkmenistanyň Döwlet çeperçilik akademiýasynyň uly mugallymy Azat Annaýew, Türkmen Döwlet medeniýet institutynyň uly mugallymy Maral Hojagulyýewa, Türkmenistanyň Döwlet medeniýet merkeziniň Döwlet kitaphanasynyň 1 derejeli kitaphanaçysy Türkmenistanyň medeniýetde at gazanan işgäri Oguljemal Orazdurdyýewa, Maýa Kulyýewa adyndaky Türkmen milli konserwatoriýasynyň «Jemgyýeti öwreniş» kafedrasynyň müdiri Gözel Aýnazarowa, Türkmenistanyň Daşary işler ministrliginiň Halkara gatnaşyklar institutynyň «Jemgyýeti öwreniş» kafedrasynyň uly mugallymy Täçnabat Paýtykowa, «Zenan kalby» žurnalynyň bölüm müdiri Ogulgözel Şagulyýewa.
Türkmenistanyň döwlet medeniýet we sungat mekdebiniň, Türkmenistanyň Döwlet çeperçilik akademiýasynyň, Türkmen Döwlet medeniýet institutynyň hem-de Türkmenistanyň binagärlik institutynyň talyplary sergä myhman hörmünde gatnaşdylar.